對沖國度：投資致勝包含耐性
今時今日，蘋果公司同三星久不久推出新款手機，已是例行公事，但次次公布之前股價例牌郁，之後又失望跌番，有批投資者好似老逢派錢，又或者每年必定會過年過節，又有甚麼理由，應該要在黃金周才去炒零售股。感覺上有如以前街市賭檔，賭三個碗入面邊個有隻牌一樣，橋爛到無倫，一樣有人講有人信。
相當低B的邏輯，依然有威力，可能是市場的集體智慧水平其實相當低，更大的理由，是太多人欠缺耐性，一味要快，永遠要概念行先，卻不理概念好醜，至緊要有，所以平常日子就不去買蘋果公司、三星、手機零件股或者零售股，要有新聞才肯進駐，才出現如此反智的長期現象。自己是着重催化劑，但可以贏大錢的機會，一定不是上述那些廉價催化劑的觸發。
光証事件又一教訓
欠缺耐性是對手主要缺點，能夠參透的話，便應該十分重視耐性這一項特質。投資能夠有得贏，不外乎是贏耐性、贏膽量、贏眼光或是贏紀律其中一項，當中以贏耐性這一項牽涉的技術含量算是比較低。
早前光大証券烏龍盤事件，對自己是一大教訓，因為倉位曝光，有一段時間成為這件事的評論專員，兼且日日被人問斬咗未。假如一早收收埋埋，正常操作會是細細坐住，伺機等形勢好轉再加，溝溝埋埋有得贏根本不難，可是經常性被騷擾之下，實在失去作戰意欲，幸好尚有耐性捱到最近局部撤退，由原本小勝變成打和，不算太大損失。
如果要靠耐性致勝，很多時候要做世俗認定是傻仔的行為，例如光証出了事，買成交偏低的冷門股，又甚至高追業績後已經升到爆的facebook等等，Do Smart未必一定Look Smart。自己不怕做傻仔，一來自恃有長期戰績，二來是阿Q精神安慰自己，批評的聲音，來自身家不及自己一成的真正傻仔，又何用理會。
豐盛金融資產管理董事 黃國英（作者為註冊持牌人士，公司客戶持有光大控股（00165）股份）