絲絲近年成日聽到港商大呻內地製造業生意難做，好似飛達帽業（01100）咁，打算將大部分生產搬去孟加拉。副主席顏寶鈴（顏太）尋日好開心咁同絲絲講，孟加拉啲工人除咗人工平同勤力之外，佢哋勝在夠「Simple（單純）」，有份工做就心滿意足，就算一粒朱古力已經可以「收買」人心，所以每次去睇廠見到班員工都好開心喎！
相反，內地人工不斷升，「獅子開大口」嘅大有人在，仲有係要求多多，啲後生仔女來見工開口就問「有冇冷氣、有冇靈活上班時間、幾多飯餸，男女比例......」！
顏太話，其實依家內地平均有成5,500蚊工資，成本咁高真係頂唔住，而孟加拉就只有十分一，500蚊就搞掂，所以到下年就將孟加拉嘅產能提高到佔整體一半，到時成本真係慳番一大截。
顏太仲希望兩、三年後，飛達個廠房規模就算唔係內地No.1，都係第二或第三。
講番個業績，飛達帽業上半年就錄得虧損，顏太解釋主要受到番禺搬廠嘅撥備影響，仲話希望所有「衰野」一次過搞掂，下半年生意做番好啲，個業績相信會「靚仔」番o架喇！