絲絲講場：內房老總「光復」富豪榜
內地樓價愈升愈有，帶挈房地產商老總重新成為各大富豪榜寵兒。尋日公布嘅二○一三年胡潤百富榜，有內地「商業地產教父」之稱嘅萬達集團董事長王健林，以1,350億元人民幣身家，撼贏娃哈哈董事長宗慶后，成為中國新首富。今年嘅排行榜上，地產富豪佔比超過23%，重新成為上榜人數比例最高嘅行業，胡潤話，最重要都係因為地產業相較舊年已「整體復甦」喎。
王健林贏埋胡潤榜
福布斯中文網幾日前率先預告，王健林身家已經去到140億美金，坐上中國新首富寶座。尋日公布嘅胡潤百富榜更加推斷，王健林嘅財富喺過去一年暴增咗超過一倍，去到1,350億元人仔，去年嘅首富宗慶后家族，財富雖然都增長咗44%去到1,150億元人仔，不過仍然要退居第二位。至於第三位係騰訊老總，42歲嘅馬化騰，排名上升四位，第一次進入三甲，同時都係前十大富豪中最後生嘅一位。
貴為首富，王健林嘅投資遍布全球，內地網站乘機問佢，和黃（00013）大規模投資英國，係咪撤資大陸嘅行為？佢話唔清楚和黃要投資英國，萬達除英國外，都有其他地方嘅投資，但核心都喺中國。佢仲話：「依家全世界都要到中國，唔通我哋放棄增長很快嘅地方，跑到增長好慢嘅地方，那就是個企業家判斷出問題了」。