相信好多人都同絲絲一樣，申請信用卡嘅時候都會畀嗰啲條款細則嚇親，因為啲字又細，條款又多，如果唔睇清楚，好容易會跌入銀行嘅「圈套」。不過，俄羅斯就有一個「反轉」嘅例子。
絲絲收到風，俄羅斯當地一位離職警員阿加爾科夫（Dmitry Agarkov）喺Ｏ八年收到當地嘅基尼科夫信貸系統銀行（TCS）嘅信用卡申請表之後，就將申請表Scan入電腦度，再將啲條款改到啱自己心水，包括欠款零利率、無限信用額、仲寫明如果銀行唔遵守條款嘅話，每次會被罰款9萬美元，就算銀行想終止合同都要畀高達20萬美元嘅終止費，點知銀行真係「批咗」張卡畀佢！
原來銀行一直懵然不知，直至兩年後銀行打算以「逾期付款」為理由，想終止合約先至發現條款原來被修改過，雙方搞到上埋法庭添！
不過，法院就企喺阿加爾科夫嗰邊，判合同具有法律效力，依家阿加爾科夫仲打算向銀行追討80萬美元嘅罰款添呀！
絲絲就覺得，阿加爾科夫當初只係想試吓銀行有冇認真處理申請，點知銀行冇留意啲條款被人改咗就批出信用卡，希望銀行可以「經一事，長一智」啦！