絲絲成日都話，商界瞬息萬變真係一啲都無錯，好似股神巴菲特同美國國際集團（AIG）呢對昔日戰友，最近就反晒面，事關巴菲特遲啲就要同AIG打對台，而AIG亦已經決定，唔會再同巴菲特嘅投資旗艦巴郡續約再保險業務。
巴菲特出晒名「百足咁多爪」，早於今年五月接受訪問時就提到，有意涉獵商業保險呢個範疇。佢透露已經搵咗一班AIG高層過檔，好似喺美國負責財產同意外保險業務嘅Peter Eastwood。
佢仲話，陸續有其他AIG員工主動聯絡巴郡，睇吓有無好路數喎。
呢個消息對AIG嚟講當然係一大威脅啦，AIG總裁本穆沙（Robert Benmosche）當時回應指公司大把人才，唔怕畀巴菲特撬走幾個，仲表示願上帝保佑巴菲特進軍商業保險嘅決定咁話。
直到最近，AIG仲宣布唔再同巴郡續約，兩家公司之間嘅火藥味就更濃。
絲絲就知道，其實兩家公司嘅合作關係一直都唔錯，作為AIG最大嘅再保險公司，巴郡承擔咗21.9億美元嘅保額，佔AIG再保險業務嘅8.5%。
余詩韻