俗語有云：「新官上任三把火」，前中證監主席郭樹清成為新任山東省長之後都有把火，之不過唔係怒火，而係對金融業嘅熱情之火！
絲絲聽聞郭樹清入省無耐，就揚言要「將山東省打造成金融中心」，並且對當地嘅金融發展狀況摸底，半年不到佢已經開始埋手「改革」，首要工作就係「招才」！
當大家聽見郭樹清話「每個市都要配一個懂金融的副市長」、「從中央金融機構抽調30名幹部到山東掛職」之後，隨即成為各大金融機構嘅茶餘飯口話題。加上當局通過「處級幹部到山東即可擔任副市長」決定，為唔少年輕處級幹部，提供咗優秀嘅晉升機會。
唔少「報名者」都係嚟自人民銀行、中證監、銀監同保監，佢哋仲話就算無得晉升，單係賺經驗都值得！內地媒體透露，目前已有5名中證監高官被挖角，預計名單仲陸續有嚟。
山東省雖然係中國GDP第三大省，但全國金融規模排喺二十名外，要喺短短五年，將山東蛻變成數一數二嘅金融中心就難啲喇，不過能夠改善當地金融環境，都未嘗不可！