自從「萬人迷」碧咸宣布掛靴，傷盡不少球迷心，一向鍾意睇波又鍾意靚仔嘅絲絲，見到球壇上又少一個型男，都曾經失落過一排。不過，碧咸離開球場，曝光率依然冇少！又拍內褲廣告，又同「地獄廚神」Gordon Ramasy合作搞餐廳，冇計啦，靚仔係多人留意o架嘛，嚟緊仲有可能涉足金融界添！
碧咸踩入金融界，唔通佢投資同球技一樣咁了得？原來係搞作多多嘅里昂證券每年舉辦嘅投資者論壇，都會請來有創見嘅人物出席，而且邀請講開場白嘅嘉賓（Keynote speaker）都相當另類，好似就試過請佐治古尼講平等；米高德格拉斯講佢喺電影《華爾街》入面嘅金句「Greed is Good」。外電引述知情人士透露，今年里昂竟然請咗碧咸嚟做Keynote Speaker，雖然未知碧咸會講咩，但外電就形容碧咸嘅出現，為論壇加添咗一種「俏皮」同「鋪張」嘅感覺。'
里昂早排畀中資嘅中信証券完成收購，外電就話請碧咸嚟，唔知係咪為咗轉移外界視線，等啲人唔會剩係掛住留意里昂被收購之後會變成點喎。但絲絲淨係諗到，論壇到時除咗財經行家之後，實會多咗一大班娛記同體育記者一齊逼餐死，希望大會會安排個大啲嘅場地就好喇。