絲絲講場：黃建業行動證明無賣盤
政府壓樓辣招，首先辣死地產代理，久不久就傳出佢哋要收縮分行數目兼裁員，上個禮拜五仲傳出美聯（01200）賣盤添，佢哋已即時澄清冇咁嘅事，尋日聯交所披露美聯主席黃建業，喺上個星期三及四，連續兩日增持股份，足證唔係賣盤啦。政府一日唔撤招，地產代理都冇啖好食，所以成班代理尋日又有「辣招苦主大聯盟」集會，呼籲撤招活動。
代理中環簽名反辣
佢哋以「沉默抗議辣招震垮各行業」為名，喺中環街頭發起簽名行動反辣招，到場後先默哀一分鐘，之後收集市民簽名，希望最終收集到20萬個簽名。
美聯董事總經理黃子華講，大聯盟尋日就停止喺各大報章刊登地產廣告一日，行動唔係要向傳媒施壓，只係成交量少咗，除咗人手同分行要cut，宣傳費等開支亦都要減，好似過去七個禮拜嘅周末，十五大屋苑嘅成交量低到冇眼睇。中原地產亞太區住宅部總裁陳永傑亦話，過去三個月公司就減咗七成電視及其他媒體廣告，慳番D錢嚟過樓市寒冬咁話。
大聯盟召集人朱建蘭就呻，旗下寶豐物業分行已經由11間縮到得5間，自置舖就轉咗嚟收租補貼代理行開支，大聯盟考慮下個月十號發起第四輪行動。