絲絲講場：光大路曲折唐雙寧話好

慶祝酒會宋林捧場

除咗光証事件困擾集團之外，西方傳媒早前仲報道，摩根大通透過聘用唐雙寧之子，而取得光大銀行業務利益，摩通正受到美國監管機構調查，再加埋烏龍盤事件，唐雙寧頓成新聞人物。絲絲見到佢，即刻撲埋去想傾幾句，不過佢揮下手就算數。至於另一新聞人物，宋林嘅出現，就令絲絲有啲驚喜。

佢早前被舉報捲入貪腐案，之後好少喺公開場合出現，不過，話晒都係光大嘅主場，為免搶人風頭，佢揮完手就匆匆入場喇，完全唔畀絲絲埋身機會。

細數30年發展歷程

唐雙寧喺致詞時總結光大集團三十年嘅發展歷程，話喺一代又一代光大人嘅努力之下，將集團嘅資產規模由起家時嘅2億元，發展到依家2.6萬億元，業務橫跨境內外機構近千家。佢話喺集團前進嘅道路上仍有曲折，但反而更有信心。

光大集團慶祝酒會參與人士高達1,600人，集團高層出席外，政府及駐港中資企業亦有派員參加。雖然晚會喺近七點先舉行，不過傍晚五點過後已經來賓不絕。

余詩韻