Market Insight：房託基金分段收集

昨日滬綜指狂升3.3%，支持港股繼續屠殺睇淡者，恒指再升129點報22,750點，主板成交增至671億元。有趣是近日熊仔愈劏愈有，反之牛證街貨量一直未見大幅增加，可反映大部分散戶享受唔到今次升市，仲要日復一日輸完又嚟賭過，變相資助大戶繼續挾倉。既然市場無視聯儲局退市的可能性，以A股馬首是瞻，今日曝光的中國八月工業生產，以及嚟緊嘅新增貸款數字，就要睇到實，睇吓會唔會又再超額完成，使中字派升勢火上加油。

維達現價欠缺水位

維達國際（03331）第二大股東SCA Group Holding BV，提出每股11元現金收購，比上周停牌前溢價38.36%，昨日維達一開已10.9元，收報10.88元升36.8%，得番1.1%水位。

事關SCA講明繼續營運現狀，亦希望保留上市地位，收購目標係為SCA其他護理產品品牌進行產合。SCA唔單止是港人熟悉的紙巾Tempo的生產商，本身也涉獵多個紙巾品牌及紙尿片產品，本身揸21.65%，估計今次出價目標係要攞到50%以上控制性股權，以便未來整合品牌。

古勝冇點你

萬里長空

SCA看似慷慨，但實際維達近幾個月，股價在紙漿價升毛利率跌預期下，五月份開始累積跌咗唔少，SCA查實只係畀番四月時價錢，以一三年市盈率19.7倍，比恒安國際（01044）的27.2倍折讓近兩成八，都買得幾抵。之但係大股東揸住24.69%，按道理SCA應該清楚成批貨，十拿九穩落袋至會出咁嘅價錢，而兩批貨加埋已佔股本46.34%，仲差三、四巴仙，隨時響街都掃到，11元樓下買去投降雖然有贏無輸，但博加價似乎又有啲不切實際。

置富長線收息之選

退市預期底下，近排防守及高息股認真慘烈，REITs更係無一幸免，就連下周股東大會表決收購天水圍嘉湖銀座商場，令可供出租樓面大增66.5萬平方呎，相當現有物業組合兩成七，有晒增長故事配合的置富產業（00778），一樣級級落，由五月高位8.61元，撻到落今浪新低，昨日報5.95元，累積已跌去近三成一。從交易資料，趁低息期未完查實早買對股東仲係利大於弊，假設交易在年初進行，半年每基金單位分派大約有4.7%增長。

美債息在退市預期勁升，上周見2.9厘，由於影響基金估值模型的risk free rate，對收息為主的REITs，衝擊可大可小，但似乎已經over done。置富勝在歷史夠長，搵番○三至○七年，次按海嘯及QE未開始時的數據，其平均分派息率5.5厘，較期間十年美債息平均高1.2厘，預測置富一三年約分派6.1厘，換句話，市場預咗美債息見4.9厘，高於現時兩厘，亦比三十年債息高近1厘，撇除無法量度市場對升息的恐懼外，似乎準備退休需要穩定收入的，現水平已可以開始分段買吓貨。

資金暫撤離風電股

昨日有內地報道指，發改委正醞釀調整上網電價政策，消息打擊風電股氣氛，龍源電力（00916）跌5.8%、大唐新能源（01798）跌6.3%、華能新能源（00958）跌7%，成交普遍明顯增加，睇落唔簡單！平心而論，雖然○九年以來風電發電成本下降五成，但CDM收入顯著下跌、維修及應收帳相關資本融資成本上升，事實上風電企業仍遠遠未復原有的盈利能力。

雖則話，政府唔能夠無了期提供補貼，退出只係時間問題，但風電業如今尚未真正完全恢復原氣，補貼政策退出的時間一定要掌握得好，否則對行業影響大，相信呢一點制訂政策者亦十分清楚。

幾隻風電股現價已回落至接近四、五月的起步位，某程度已反映利淡消息，宜留意政策消息進展。另一點可留意，乃風電股呢次跌浪已有半個月，同期周期性股份卻重現升勢，交投轉活，故不排除是炒作資金暫離風電股，轉炒周期性股份有關。若想捕捉風電股下一浪的入市點，不妨留意周期性股份升勢能否延續下去，以判斷資金去向。

古勝