「12386」受理投訴諮詢
隨住中國經濟逐步同國際市場接軌後，的確有設立處理金融服務投訴渠道嘅必要性。中證監新聞發言人尋日就公布，開通熱線12386嘅目的，係想令投資者訴求可以多方面發表，仲講明會接受證券、期貨市場投訴、諮詢同建議。
網民唔領情 爭相惡搞
不過，網民嘅反應就彈多過讚，留言反問投訴有冇用之外，仲取笑指話等呢個熱線上市之後，會買100股添，仲有網民笑稱，電話號碼係空號根本就打唔通。
雖然市場對熱線設立正面嘅唔多，不過亦有網民點名讚揚中證監主席肖鋼，話保護投資者終於唔再只停留喺紙上，A股有上升希望！絲絲都覺，設立投訴渠道對小股民嘅權益更有保障。
余詩韻