一手住宅銷售條例四月底實施後，地產界風雲變色，近排都聽見唔少發展商嘅售樓部高層出現人事變動。香港興業（00480）尋日中午發出通告，話香港業務部總監陳子明（CM）將提前退休，並同時辭去發展及市場部總監一職。CM喺公司做咗超過三十年，係公司老臣子，今次退休聽講係想享受人生。
絲絲都識咗CM好多年，佢主要負責物業發展同投資物業，大嶼山愉景灣係佢一手湊大，其後進軍東涌同荃灣等地區，其實佢只係五十幾歲，突然話提早退休，絲絲問過CM嘅同事，話佢健康冇問題，今日仲如常返工，而提早退休嘅原因係想享受一下人生喎！
CM嘅辭職會喺十月一日起生效，佢嘅工作會由香港興業執行董事鍾心田同總經理史慕蘭（Vivian），按功能分配接管。其中Vivian喺香港興業都做咗好多年，近年負責海外物業發展，曾經都跟過CM搞本港樓盤銷售及推廣工作。