絲絲講場：茅台唔上300 有人請食飯

白酒業同高級消費一樣，自從中央實行「限制公務消費」政策以嚟，都冇運行，A股龍頭、被譽為中國國酒嘅貴州茅台，無論售價同埋股價都勁跌，就知到當中嘅威力。前幾日，貴州茅台就公布咗「史上最差半年」成績！

根據呢份「史上最差半年報告」，公司上半年營業收入141億元（人民幣‧下同），同比增長6.5%，只係比○三年「沙士」嗰陣好少少咋！而淨利潤得72.5億人民幣，同比增長只有3.6%，係公司自○一年上市以嚟最差嘅業績！消息公布之後，茅台股價星期一開市即時低開5.2%，唔夠十分鐘仲跌到「停板」添呀！

瑞銀證券都將茅台嘅目標價由256元下調到238元呀，好多散戶都即刻沽貨走人。

不過身為茅台超級「粉絲」嘅股壇名人但斌，喺微博落咗賭注，雖然深信白酒企業「躺着」賺錢嘅日子一去不復返，但仍然對茅台好有信心，「如果去到明年九月十一日，茅台嘅股價冇300元嘅話，我就請客吃飯！」

但斌以前嘅戰績如何？佢曾經喺一年前，開出盤口，滬綜指一年內不會跌破1,800點，結果贏咗。