絲絲講場：英央行卡尼渾身明星味

今年新官上任嘅英倫銀行行長卡尼（Mark Carney），處事作風大膽就人人都知，好似之前宣布將息率同失業率掛鈎，都令唔少人跌眼鏡。不過絲絲留意到，卡尼喺衣着方面都好大膽o架，仲畀時裝達人形容為「銀行界佐治古尼」添！

大家對銀行家嘅印象一般都係着深色西裝打領呔，條呔都唔會太花碌碌，好聽啲講係打扮平實，唔好聽，就係成個look都好鬼悶。不過卡尼就嘗試打破框框，每日返工套西裝同領呔嘅配色都會襯得鮮色啲，絲絲就見佢打過鮮紅色、鮮綠色等等嘅領呔，睇落真係好精神。

時裝達人話，卡尼着嘅西裝全部都好啱身，恤衫多數係開領設計，加上條領帶唔會太粗，令到佢望落好醒目同討人歡心，行出嚟直頭就係佐治古尼咁樣！

呢位時裝達人仲話，前任行長金默文（Mervyn King）衣着就比較保守，日日都係着差唔多款嘅恤衫領呔，十足一個標準銀行家。配合番佢在位時處事比較謹慎嘅作風。

不過，你哋唔好以為淨係外國先有「明星行長」啊，其實中國人民銀行行長周小川都好有「星味」o架。絲絲就知道，今年佢出席人大會議之後，好多人排隊想同佢合照，有啲仲要拎埋佢簽名添，受歡迎嘅程度簡直同明星無分別啊！

余詩韻

絲絲講場：英央行卡尼 渾身明星味