Market Insight：港口股候調整買貨

隔晚華爾街三大指數反彈，道指升48點報14,824點。講到底，近期道指由八月初歷史高位15,658點，碌到落隔晚的14,760點，完全出於股市對聯儲局退市在即的預期。隔晚所見，連續三日回落的十年期美債孳息，再拗腰倒升收2.76厘，華爾街無視二手房屋銷售差過預期的數據，除非下月中聯儲局議息繼續將退市議題施以拖字訣，或接任伯南克的下一任主席安撫市場話唔使退市住，否則大孖沙繼續去槓桿，個市陰陰乾的情況會持續多一兩個星期。

聯想似抵買過小米

期指結算日，港股反彈180點收21,704點，成交縮到僅僅過五字頭。由22,500點碌落嚟，基金有幾大興趣撈底，由奀到極的成交一目了然。九月期指日市收21,560點，低水144點，轉淡倉期指大戶，看來是相比較進取，昨日連沽空都縮埋，佔大市成交比例，由前日13.7%落番去10.2%，暑假進入倒數階段，唔少芬佬陪家人遊埠享受天倫樂，今日基金月結只怕未必有大時代，好大機會都係睇住外圍走。

古勝冇點你 2013/08/30

萬里長空

內地手機生產商小米，放料由Google的Android系統開發團隊中，撬走副總裁Hugo Barra，借殼金山軟件（03888）消息又再舊聞新炒，金軟股價升7.5%報16.82元，創歷史新高。內地傳媒話話小米企業價值達100億美金，即780億港元，換句話，大隻過金軟加埋富智康（02038），兩者市值分別198億及373億元。以上半年小米智能手機出貨量係703萬部，相當於同期聯想集團（00992）出貨量1,980萬部的三成五左右。

昨日聯想市值仲差些少至夠100億美金，如果小米咁值錢，聯想就更加抵買，7.52元買落去，等於三成五智能手機生意價值，其他PC及平板硬件生意免費，聯想真係要諗諗分拆手機生意上市！

港交所腰骨受考驗

話說回頭，阿里巴巴集團上市搞到TMT股估值計算方法真係亂晒龍，AB股制被否決後，傳公司拋出合夥人方案，繼續換湯唔換藥，總之要達到小股掌大權目標。今鋪港交所（00388）腰骨夠唔夠硬，抑或為做靚盤數爭巨無霸上市乜都肯制，可見真章也！無論AB股抑或合夥人制，都係剝削小股東方案，畀上市公司自己訂遊戲規則，肯定係未來一大災難。

個市炒無可炒，靜過鬼的港口股突見火燒冷灶，上海建自由貿易區，大行估下半年中國外貿數字回升，國家主席習近平在遼寧大連考察，都成為炒作理由，招商局國際（00144）昨日升9.7%，天津港（03382）升7.5%，大連港（02880）亦升7.4%。上海自貿區真係十畫未有一撇，但招商局啱啱出業績，上半年賺19.35億元升10.2%，核心項目有13.1%增長，期內，集裝箱吞吐量3,266萬標準箱（TEU），升11.8%，散雜貨吞吐量1.77億噸，升8.8%。如果睇番上半年，中國規模以上港口完成集裝箱吞吐量9,147萬TEU，按年升8.3%作比較，招商局表現優於同業。

大行估全年賺41.41億元，市盈率15.1倍，○九年前中國進出口貿易一直維持高增長，招商局往績PE可以去到20至26倍之間，目前低估值正反映貿易量放緩的實況，假如第三季是內地出口的黎明前的黑暗期，股價是有條件再上，如能重返四年平均值16.9倍，可見28.5元左右，不過這隻平時beta較低的股票，昨日升咁多，或者捧場客可以等落返24至25元之間再諗。

中資企業流年不利

今年大型紅籌國企幾運滯，內銀、內險及內房受累內地宏觀經濟問題，股價無力大翻身唔在講，圍繞中企高層的負面消息，搞到股價大幅波動的例子亦不乏，好似先前的華潤系股份，近日又輪到中石油（00857）同昆侖能源（00135）兩母子當災，連近日中東局勢緊張，國際油價回升，中石油亦無緣受惠。所以話，股票都有「三衰六旺」，中字股風光不再，現任中紀委掌舵人十分熟悉中企運作，要拉起打貪大旗，各位老總們自然忐忑不安，買賣中字股的股民，又多一個風險因素要考慮。

古勝