美國聯儲局估領袖遊戲去到關鍵時刻，前財政部長薩默斯 （Lawrence Summers）同埋聯儲局副主席耶倫 （Janet Yellen），係公認嘅熱門。為咗令大家更「了解」候選人，傳媒已經起埋佢哋嘅身家底勢，等大家「秤下」。
《華爾街日報》引述美聯儲披露嘅資料顯示，喺克林頓時期做過財政部長嘅薩默斯，依家並非公職人員，唔使公開披露自己最新嘅資產淨值，但睇返一○年佢最後一次披露身家，當時已有720萬至2,450萬美元（約5,583萬至1.9億港元），究竟總數升咗定跌咗，就不得而知喇！
佢嘅「勁敵」耶倫，係身家水平上，就輸咗比薩默斯。資料顯示耶倫同佢老公George Akerlof（曾獲諾貝爾經濟學獎），喺一二年嗰時，都有成480萬至1,320萬美元（約3,723萬至1.02億港元）身家o架。
論身家，薩默斯同耶倫兩個都係「重量級」人物，相比之下，現任主席伯南克舊年嘅身家就真係少好多啦，只係得110萬至230萬美元（約853萬至1,783萬港元）咋！
雖然薩默斯同耶倫各有支持者，不過絲絲聽講，近日就傳出薩默斯先係奧巴馬嘅心水人物，事關佢唔單止係白宮前首席經濟顧問，而且佢曾經喺花旗集團同埋對沖基金公司DE Shaw做咗好多年，對華盛頓同華爾街都有一定嘅人脈關係同了解。
余詩韻