絲絲講場：巴西世界盃睇波套匯
生活上嘅經濟學其實好多，依家最實用嘅例子係出年舉行嘅世界盃。
大家都知世界盃出年喺巴西舉行，巴西嘅貨幣雷亞爾係咁貶值，於是出現咗套戥機會，利潤高達兩成。
門票分本外幣兩種
事緣每一屆世界盃都會有兩種門票分開發售，一種係國際性發售嘅門票，價錢以美元做單位；另一種就只會喺主辦國內發售，價錢以當地貨幣做單位。國際足協FIFA今年五月為門票定價時，參考咗30間國際銀行對雷亞爾未來一年嘅匯價預測，當時定下每美元兌兩雷亞爾，勢估唔到新興市場股匯跌到阿媽都唔認得，淨係過去三個月，雷亞爾已經貶值16%，依家牌價大概係一美元兌2.4289雷亞爾。
雷亞爾大冧執平飛
於是乎，好多人即刻用美金換雷亞爾，然後用FIFA定下嘅雷亞爾兌換價去買飛，相同產品，價格差兩成，仲唔係套戥絕佳機會？
八折買票，難怪咁多球迷千方百計撲飛啦。其實類似嘅情況喺上一屆，南非世界盃都有出現，不過呢個匯率差價喺賽事開始後就消失，睇嚟巴西球迷要好好把握呢個「特價時段」喇，萬一巴西央行出辣招，干預匯市，勁沽美元，咁你就走寶喇。
余詩韻