SOHO中國（00410）主席潘石屹，最近好似轉咗行咁，唔sell地產，反而仲不斷喺微博宣傳佢嗰套獨門減肥秘方，唔少人會跟。不過有營養師就話，呢個減肥方法唔健康，叫潘石屹唔好教壞人喎！
佢嘅獨門秘方，係每日都飲蔬果汁減肥，結果一個月後就輕咗足足五公斤喇！佢太太張欣都喺微博爆料，話佢哋兩公婆依家日日都飲兩杯果汁同四杯蔬菜汁，好輕鬆就可以減磅。不過有營養師就表示，呢種減肥方法唔適合長期進行，仲會令到身體營養唔均衡啊。
營養師話齋飲蔬果汁雖然都會飽肚，亦可補充足夠嘅維他命同礦物質，但就有可能因為吸收唔夠能量，而引致低血糖。
醫生粗略計過，如果跟住呢個餐單進食，每日只會攝取600卡路里，比一個成年女性嘅每日攝取量少好多。話雖如此，潘石屹間唔中會喺微博show吓自己嘅跑步紀錄，絲絲就覺得幾奇怪，點解佢仲有力氣跑步呢？
原來潘石屹除咗飲蔬果汁，平時都有食正餐嘅，好似前兩日佢就放咗張食麵嘅相上微博喇，咁大家就唔使擔心佢會因為減肥而體力不支啦。
余詩韻