騰訊（00700）以即時通訊（IM）軟件微信5.0，進軍移動電子商務，被喻為內地電商革命新開端，阿里巴巴集團作為最大潛在對手不甘示弱。絲絲就收到風，阿里為咗要員工用返阿里自家開發嘅社交即時通訊軟件，竟然懸賞合共35萬元人仔，鼓勵員工向親朋好友推介並使用呢款暫名為「來往」嘅「新」軟件。
阿里嘅「來往」早喺前年開始測試，其服務結合類似Google+嘅社交與微信嘅即時通訊功能，軟件已可以下載，之不過阿里冇谷宣傳，外界就冇乜留意。
阿里今次嘅懸賞推廣，主要係要求員向同事以外嘅朋友與家人推廣「來往」，到年底透過「來往」成功獲得最多活躍好友（阿里員工當然唔計數）嘅員工就可獨得10萬人仔嘅一等獎，二等獎則有三名，每人5萬，三等獎亦有十名，每位1萬，數數手指合共懸賞35萬人仔，都咪話唔大手筆。
講開內地IM大戰，當然要提埋中國電信（00728）與網易聯手推出嘅「易信」，呢個名原來好Hit，鬧出三胞胎，包括「易信」在內，應用商店目前就有多套同名嘅軟件，當中一款叫「易‧信」，推出日期仲早過「易信」，更具備即時通訊功能，睇嚟「易信」名稱嘅擁有權，可能又會有爭奪戰！
至於另一位網絡強人，百度李彥宏都講明，繼之前收購91無綫後，百度會力拓移動互聯網嘅發展，並將會強化移動支付嘅配套，表明唔會落後對手嘅發展。
余詩韻