Market Insight：手機股只宜跟勢炒

隔晚道指六連跌，挫105點報14897點，跌穿今年升浪中，二月及六月兩次低位的延伸支持14,934點，後市會係破位急跌，抑或掂到支持後死貓彈？單睇美債息帶住個估值模型risk free升唔停，只怕九月水落石出前，現時形勢難以扭轉。

昨日滙豐中國的八月製造業PMI，由七月47.7強力反彈到50.1，遠高過市場預期的48.2，將港股由21,500點樓上拉番上嚟。午後，歐盟大佬德國八月服務及製造業PMI雙雙勝預期，連跌五日的港股終於彈番77點收市，主板成交573億元。滙豐PMI跟官方PMI上番50樓上後，美銀美林認為數據強化了該行對中國第三季經濟，可交出7.6%增長預測，但最古怪係滬綜指當數據無到，微跌5點，收報2,067點。

古勝冇點你 23/08/2013

萬里長空

中興再受大行看好

中央講明唔走回頭路推4萬億人仔基建救經濟，「中國寬帶」及發展4G概念，成為塘水滾塘魚的中資股中，今年重要投資亮點。

瑞銀預測中國第四季發4G牌照，由近日中移（00941）及中電信（00728）聯袂話今年額外投資50億元人仔去發展TD-LTE（即國產4G）網絡，明年TD-LTE網絡固定投資達到350億至400億人仔，瑞銀證券話中興通訊（00763）是目前內地TD-LTE網絡設備的主要研發企業，估計與華為合共佔超過五成設備市場大餅，受惠於4G市場，瑞銀將目標價由15元調高到18元。

對中興今年走勢滯後於幾間手機生產商，古勝自己真係好失望，由近日陸續曝光的手機股業績，的確對辦，TCL通訊（02618）半年蝕2.07億元，但拆開兩季，第一季蝕2.46億元，第二季轉賺3,841萬元，第一季賣150萬部智能電話，第二季已倍增至320萬部，賣點是轉虧為盈的故事。

中國無線（02369） 半年賺2.128億元升40%，銷售額96.3億元大升54.9%，主要係旗下3G產品，包TD-SCDMA、CDMA-2000以及WCDMA網絡手機，銷售錄得逾五成增長，上半年4G產品僅佔手機銷售收入3%，個個估發牌，4G會好似3G產品一樣，銷售呈井噴式的爆發。

長遠前景勿太樂觀

內地熱賣的小米手機，由中檔「小米4S」，撈過界賣埋799人仔有交易的「紅米手機」，可以平成咁，第一個感覺係智能手機利錢之薄，與股市內受歡迎程度有點不成正比，以中國無線上半年業績為例，純利率2.2%，出名利錢薄的電視生產商創維（00751），過去兩年純利率都有4.5%及4.2%，如中國無線可以去番○九、一○年黃金時期的雙位數，前途無可限量。

近日據知唔少內地OEM廠都想轉攻手機組裝，愈來愈似十幾廿年前的白家電及電視行業，對行業毛利及利潤率，長遠古勝唔多樂觀，但個市要炒亦都無謂鬥氣，要清楚追潮流無問題，做人世就可免則免，始終智能手機芯片及軟件技術統統唔係中國公司擁有，全部由歐美企業龔斷。

聯想集團（00992）首季業績，收入升9.7%至87.87億美元，純利1.74億美元升23%，主要係智能手機為主的移動互聯及數字家庭（MIDH）收入升近倍去到12.03億美元，佔總收入比例升至13.7%帶動。全球個人電腦出貨量今年會是PC面世以來首年下跌，聯想涉足平板電腦及智能手機，配合由PC過渡至PC+的策略。睇估值過往閒閒哋20至30倍，依家預期13.1倍，高於歷史低位11.8倍僅一成一左右，可見無論PC或者智能手機，說穿了，大家都預咗行內將會好似打泥漿摔角一樣。

炒光伏股要識篩選

多晶硅價格回升至今年四月以來高位，但消息對光伏股刺激作用似乎有限，保利協鑫（03800）以全日高位2.04元收市，升幅5.1%，比對過往表現，如此升幅實屬溫和，其他光伏股亦只係個別發展。

外圍風頭火勢，炒家落場炒風亦有所收斂，即使肯落場跟炒，亦唔敢買得多，怕一旦外圍崩盤又要坐跳樓機！再講，多晶硅價格回升，唔係每隻光伏股都可以受惠，例如專門做下游業務的企業成本可能會增加，故看官炒還炒，亦要慎選炒作對象！

古勝