衡量公司做得好唔好，有好多指標，視乎你點揀。內房股富力（02777）淨負債比率唔多靚仔，不過老闆李思廉就叫絲絲睇埋其他比率，至好落判斷喎。
李思廉四月時都講過，公司嘅淨負債比率會升啲，尋日公布嘅中期業績，呢個比率已超過100%，絲絲都嚇咗一跳。李總解釋，睇內地樓市前景睇得好好，所以買多咗地。
佢仲教路，睇間公司健唔健康，唔應該只係睇個負債比率高唔高嘅，好多比率嘅計算方式亦都各有不同，而計算個時間係點都會好影響，要睇數據就應該睇全年業績會好啲喎！
李總話，就好似人咁，好多量度人體健康指標嘅乜乜率、咩咩率，其實啲標準都已經係幾十年前所訂下，「依家啲人嘅壽命都唔同晒，以前啲人六十歲就瓜，依家起碼都八十歲啦！」佢又話，有時亦係時間點嘅問題，因為啲會計制度，要截數嘅時間咁啱嗰時比較高，啲公司有咁上下規模，有時負債係會高啲o架喇！
至於內地咁多調控，富力會唔會好似其他內房咁嚟香港發展，李總就笑笑口話要睇下先，仲話「其實家陣香港（樓市調控政策）都好似內地咁啦！」