阿里巴巴嘅「餘額寶」炒熱互聯網金融概念，近排內地無論係銀行、基金定證券公司，大家一窩瘋咁湧去研究點樣將傳統金融業同互聯網結合，務求喺呢個高速發展嘅市場上分一杯羹，而身負行業監管使命嘅人行行長周小川更加快人一步，唔止自己開咗第三方支付帳戶，有用手機支付嘅一手經驗，仲一早叫人行研究生部，開定課題，鑽研吓互聯網金融同互聯網銀行。
周小川除咗人行行長嘅正職，仲同時兼任清華大學經濟管理學院，同人行研究生部嘅教授同博士生導師，前兩日佢接受內地《央視》專訪，講到近排大熱嘅互聯網金融概念時，忍唔住透露咗佢可能係最早叫自己班研究生去研究「互聯網金融」、「互聯網銀行」呢啲題目嘅導師。
內地互聯網金融快速發展嘅同時都充滿咗爭議，周行長承認，互聯網金融有風險，有啲嘢同現行嘅法律法規有衝突，但佢堅持對新鮮事務要保持正常嘅心態同支持創新嘅理念，好似基於互聯網嘅第三方支付，佢覺得已經有明顯嘅發展趨勢，人行對於呢樣嘢目前處於觀察範圍，過程中間都會提示下安全性，不過講到行業前景佢就相當之樂觀喇。
余詩韻