「中國首富」排名又再執位！彭博社啱啱公布最新嘅億萬富翁排行榜，大連萬達集團董事長王健林，今年就「打低」娃哈哈集團董事長宗慶后，成為新一任中國首富。
王健林以142億美元（約1,108億港元）淨資產，取代咗宗慶后成為中國首富，至於喺亞太區富翁榜佢就排行第六，全球排名就係66位。雖然王董係做地產生意起家，但你哋唔好以為佢淨係獨沽一味啊。
佢名下大連萬達集團嘅生意真係好多元化，除咗地產，仲有酒店、旅遊、文化產業同百貨公司等。例如集團上年先用咗26億美元收購美國第二大電影院線AMC，成為全球最大嘅電影院線；又計劃擴充旗下嘅購物中心，預計到出年全國就會有110間「萬達廣場」喇。
王董除咗有錢，都好鍾意做善事。佢曾得到「最具愛心慈善捐贈個人」嘅稱號；三年前青海玉樹地震之後，佢亦因為踴躍捐款，獲中央政府頒發「全國抗震救災模範」嘅稱號。
余詩韻