中環商業地段寸金尺土，食晏都辛苦啲，又貴又多人，打工仔最想公司提供員工餐廳，舒服兼平啲。渣打銀行最近翻新德輔道中總行部分樓面，「揼本」增設員工餐廳，名為「zone.d」，個名原來仲有三重意思添。
絲絲聽渣打解釋，zone呢個名同觀塘渣打銀行中心相同，後面個d字，係代表德輔道（Des Voeux Road）總行；成個名一齊讀，普通話諧音係「兄弟」，粵語諧音係「鬆啲」，寓意員工可以間中Relax下，叉足電再搏殺過。
zone.d所在嘅位置係總部M層，原本係優先理財中心，依家搬咗去下一層，客人從德輔道中一入銀行就見到。餐廳由Simply Life提供餐飲服務，雖然無得明火煮食，但係多咗個地方休息，員工梗係開心啦。途人經過見到，仲以為中環又開多一間新餐廳添。
zone.d八月一日開放畀員工使用，尋日第一次用嚟搞新聞發布會，講渣打嘅個人人民幣業務，渣打好有心思，特別整咗好多印有人民幣符號嘅茶點同咖啡招呼傳媒。
余詩韻