英倫銀行行長卡尼雖然係新官上任，但係佢不遺餘力喺當地推動男女平權，繼上月宣布未來推出嘅十英鎊鈔票將會印上十九世紀著名作家珍奧斯汀嘅肖像之後，佢又有行動。
佢上周四接受英國廣播公司（BBC）訪問時就直言，注意到貨幣政策委員會（MPC）自從一○年中以來出現女性絕迹嘅現象，令財相歐思邦喺MPC引入女性嘅壓力增加。
原來，自英倫銀行九七年脫離政府獨立運作以來，33位服務過MPC嘅成員中，只有4名女性。而由9人組成嘅MPC，英國財政部就掌握其中7席嘅任命大權。既然卡尼開到聲，相信歐思邦點都會考慮吓佢嘅意見。
歐思邦下次可以為MPC注入新血嘅機會，係填補將喺明年六月離任、負責貨幣政策嘅副行長比恩。
有英國女議員認為，要求喺MPC加入女性成員，並唔係女權主義，而係擴大委員會視野、吸收來自不同背景人士意見嘅必要方法。
不過，講開又講，要為MPC加添女成員都唔係話咁易o架，睇番過去三次出現空缺時，申請人嘅男女比率竟然高達26比1，女申請者真係少之又少。
余詩韻