阿里巴巴旗下嘅阿里金融非常進取，好似前排就推出咗基金產品「餘額寶」，成功吸引到唔少客戶。
但絲絲聽內地銀行界嘅朋友講，有幾間大銀行擔心阿里金融會喺市場分一杯羹，所以成立一個類似「打阿里指揮部」嘅虛擬組織，專責睇實阿里金融一舉一動，當有新產品推出時，佢哋就會上報到監管機構，等呢啲產品無得發布！
內地銀行界仲有一個講法，阿里金融同各大銀行合作時態度都好強勢，銀行基本上只要負責融資就可以，所以願意同佢合作嘅都係一啲不思進取嘅銀行咁話。
既然同大銀行嘅關係麻麻，阿里金融就決定搵細銀行合作，聽講佢哋打算向國內區域性嘅細銀行提供雲端運算服務，以換取融資合作關係。阿里金融咁識變通，難怪業務會蒸蒸日上啦！
講開阿里做生意好進取，最近阿里旗下嘅淘寶網推出專為香港人而設嘅家居及婚慶用品頻道，查實香港姊妹結婚時都會為張羅嫁娶用品頭都大晒，想為婚禮同新居買啲靚靚裝飾，但又受budget所限，淘寶網呢招果然貼晒心。
余詩韻