絲絲講場：永隆80周年出書講古
今年係永隆銀行成立80周年，咁多年嚟銀行其實經歷過唔少風雨。好似喺二次大戰期間，因為要避難，就惟有將金條收埋喺荒山野嶺度，戰後幾經波折先拎得番晒出嚟，當中嘅情節扣人心弦，簡直同粵語殘片有得揮！
戰亂埋金成復業關鍵
時光回流至上世紀二次大戰期間，永隆創辦人伍宜孫嘅細佬伍絜宜，喺柳州為咗保存僅有嘅資本，就吩咐廚師將金條放喺幾個大陶罐入面，再用大米覆蓋住，之後埋喺鄉間山上，並喺周圍加上記號。
戰後，伍絜宜醒起當年埋喺山裏面嘅金條，雖然打咗好多年仗，但當年做嘅記號仍然清晰可見，於是即刻派當年嘅廚師去掘番啲陶罐，幾經波折下，終於攞番晒啲金條，而永隆亦得以復業，生意愈做愈大。
擠提年代獲客仔力撐
其實精彩嘅情節仲有好多，已辭去永隆非執行董事嘅伍氏家族後人伍步謙就同絲絲講，上世紀六十年代香港銀行曾經擠提，當時有個客揸住部靚車去永隆入錢，以示對永隆支持，等其他客唔駛慌張咁話。
如果嫌未夠喉，不妨留意永隆即將面世嘅紀念刊物《櫛風沐雨八十年》，好快應該會喺書店有得賣。
余詩韻