立法會議員張華峰喺冇耐之前嘅飯局中，同港交所（00388）行政總裁李小加火併，估唔到尋日再向李小加開火！佢尋日出席一個午餐會時，提到小加掌舵港交所四年間，交易所股價節節下挫，一啲成績都交唔出，令業界失望。
佢愈講愈慶，話由海歸派嘅李小加掌舵，將香港由一個為企業融資嘅平台，變成一個高風險嘅投機市場。喺唔公平、唔合理嘅制度下，令小投資者損失慘重，紛紛離場，導致港股成交萎縮。
佢話港交所以國際接軌為名，推出多項新政，收窄中小券商嘅經營空間，好似港股加時、扣減飯鐘咁，搞到經紀無啖好食，亦唔能夠利用午飯時間同客戶做聯絡、推介，生意大受影響。今年推埋夜期，亦冇為市場帶來新商機，只有加重券商成本，好多時夜期都得二、三千張，「唔做又怕客戶流失，做又未夠交燈油火蠟」，進退兩難。咁都不特止，佢話港交所去年斥巨資買番嚟嘅LME，依家仲要畀人告。
張華峰咁多苦水，睇嚟佢真今次係谷爆！依家中小經紀行愈執愈多，張華峰身為金融服務界嘅議員，當然要為業界發聲嘅！