Market Insight：港股悶局在所難免

自從美國聯儲局主席伯南克在退市問題上，反口覆舌，資金似乎無興趣再一面倒捧美元，美匯指數由高位84.96回到81.68，日圓匯價創近六星期高位，令「安倍經濟學」透過推冧匯價，刺激出口以振興經濟的故事，有逆轉的情況。今早日本央行議息，會唔會又出口術推低匯價「扶番」個股市上去，大家拭目以待，但中港經濟缺乏令人振奮的經濟消息，股市繼續塘水滾塘魚，恐怕在所難免。

渣打較具吸引力

昨日朝早傳來越秀集團準備埋備用信貸，向創興銀行（01111）提出收購，後者一早高掛免戰牌。一堆本地銀行股當正會被睇中一樣，統統炒高，大新銀行（02356）升13.8%，大新金融（00440）升8.7%，永亨（00302）升4.7%，大眾金融（00626）升4.4%。除大眾之外，其他幾隻係市帳率愈低，升得愈多。

古勝冇點你

萬里長空

今時今日，能夠吊起嚟賣的本地銀行所剩無幾，但斷估要連續出現兩宗交易，機會細過中六合彩。如果有閒錢放埋一邊，三五七年都唔覺，古勝唔會阻你發達，但散戶一般得一兩注本錢，這類守株待兔玩法，肯定唔啱閣下，仲係戥人高興就算。

值得一提的是，業績可能十年以來首次無增長的渣打集團（02888），績後股價不跌反升，昨升2.5%報187.5元。經過海嘯及歐債危機，展望中亞經濟增長，長遠而言仲係勝過歐洲，一四年市盈率唔到9倍，渣打由年初高位215元跌落嚟，短暫業務整固的負面因素反映得八八九九，無論以估值或者增長前景去衡量，在下覺得渣打優於滙控。

發改委公布六間奶粉企業違反反壟斷法，限制競爭行為，合共處罰約6.7億元人仔，成為內地反壟斷史上最大一張罰單。多美滋、雅培（上海）、富仕蘭（上海）、恒天然商貿（上海）及美贊臣外，香港上市的合生元（01112）都中箭，合生元被罰去年銷售額6%罰款，相當於1.63億元人仔，以分析員預期一三年盈利9.37億元人仔計，估計盈利因此減少17.4%。

合生元現價唔平

估佢唔到，昨日合生元股價早市撻落40.55元後，好快拗腰倒升，收市升6.4%報44.5元，幾乎返回六月底被指責反壟斷前水平。自七月初低位29.5元起步計，累積更升50.8%，市場當無事發生一樣。金英報告指銷售額6%的罰款，確實出乎預期，該行估計只係1至2%。

股價最老實，反映市場預期今次發改委擺姿態，好可能係一次過，唔會有限價或者直接價格管制跟尾。幾間壟斷市場的大品牌畀完錢，息事寧人之後，會繼續掌控市場牛耳。估計加埋恒天然回收事件，對主攻300至500元人仔高價法國進口嬰兒奶粉市場的合生元有利，年初至今累積升逾八成，估值貼近23倍一三年市盈率係唔平，只適宜出現較大調整先入市。

古勝留意到，唔少內地媒體對恒天然出事趁機幸災樂禍，話外國月亮唔一定特別圓。實情唔少內地品牌，近日也忙於回收及將產品下架，內地奶粉業先天不足，奶源自給率低，八成進口奶粉依賴新西蘭，即使洋奶粉個金漆招牌唔多唔少有傷害，內地品牌今次都未必攞到着數。

造紙股未宜樂觀

上周四、五造紙股升過兩日又再上演高台跳水，玖龍紙業（02689）股價由上周五高位5.64元回落至昨日低位4.9元，累跌13%；理文造紙（02314）跌得仲深，由上周五高位5.68元回落至昨日低位僅4.46元，累跌21%，且兩股股價下跌成交齊齊放量，似乎大戶對下半年行業景況不感樂觀，暫不宜輕率入市撈貨。

古勝