絲絲講場：股神陪你糖廠食放題
股神巴菲特嘅慈善午宴拍賣，帶領咗潮流，唔少人都跟風。近日股東又有新嘅籌款方式，大家不妨諗吓有冇得抄。
今次佢化身為「朱古力掌門人」，拍賣四個quota，四位「得獎者」由股神陪住參觀旗下糖果品牌See's Candy，仲可以任食糖果廠裏面嘅糖，呢個「放題」方式，無論大人小朋友都會好有興趣！
拍賣嗌到27萬 抵過午宴
今次拍賣嘅網站同樣係charitybuzz.com，拍賣時間長達兩個禮拜，至八月十三日結束，所得款項將會捐畀洛杉磯嘅非牟利教育機構。絲絲尋晚睇過最新叫價，已經去到3.5萬美元（約27.3萬港元），比起午餐拍賣划算好多，之前錯失同巴菲特食lunch拍賣嘅朋友，千祈唔可以錯過！
股神同See's Candy嘅關係已經超過40年，巴郡早喺七二年，已經從See家族，買起咗See's Candy嘅擁有權。今次拍賣主要包括參觀位於加州嘅See's Candy糖果廠半日，期間享受朱古力同糖果「放題」，又可以同巴菲特稍作會面。股神仲話佢會教勝出拍賣嘅朋友點樣食bonbon，即係外層包住朱古力嘅糖啊！
余詩韻