近日清盤話題炙手可熱，唔知大家又記唔記得當年南太電子以「自行清盤」方式曲線私有化，搞到滿城風雨。絲絲尋日撞番有「電子大王」之稱嘅南太集團主席顧明均，呢位傳奇人物近日又有奇事，自言冷手執到熱煎堆，唔覺意食咗「前海概念」條水！
話說喺美國上市嘅南太集團，廿幾年前已經喺深圳開廠，勢估唔到同廠房距離十分鐘車程嘅前海，搖身一變成為鳳凰，會打造為金融區，同上海鬥過。顧明均間廠雖然好新淨，但唔搬唔得，既然中央要呢區「騰籠換鳥」，誓要將雀籠啲鳥換過晒，只容納具標誌性嘅物業，鄰近嘅107國道又禁大車使用，間廠唔搬都唔得，原廠地「被迫」重建，起靚好多嘅商用物業囉。
嘩！咁樣一計，塊地咪身價飛升？顧明均話，以六倍容積比計，可建樓面面積達到30萬方米，同埋估計四年後每平方米值3萬蚊（人民幣‧下同），成個項目就值90億，扣除30億元建築費，仲唔係冷手執個熱煎堆！再加埋上個禮拜前海第一次賣地，就出現天價，益晒附近嘅地皮，唔怪得南太喺美國嘅股價連續兩日大升，睇嚟美國嘅投資者都識得搵前海概念股。
未來咁多project，顧明均就嚟70歲，會唔會退休都未完成呢啲項目，佢笑住話冇咁快退休，因為有兩單官司纏身，不過，佢笑笑口話自己打慣官司，咁多年大大小小官司都有50單，絲絲笑佢大有資格開班授徒，教人點樣打官司。
余詩韻