Market Insight：內銀估值偏低有因

炒極都仲咁夠鑊氣的騰訊控股（00700），再升14元創363.6元收市新高，連同友邦保險（01299）分別貢獻恒指49點及20.8點，佔大市升幅三分之二。七月期指結算價21,932點，八月期指日市收報21,944點，低水9點，周一未平倉合約升至9.12萬張，估計昨日結算之後會升至9.5萬至10萬水平，稍高於上月中時水平。

昨日有27隻股票創52周新高，新低有17隻，撇開成交疏乾跌之流，當中不乏基金股，統統屬於短期展望麻麻，暫時搵唔到藉口去買嘅一類，中國鐵鈦（00893）、鄭煤機（00564）、俄鋁（00486）同聯華超市（00980）外，仲有新華保險（01336）創埋上市新低，一三年市帳率估計落到約1.4倍，幾隻內險股中佢算合理。

內險股或借勢反彈

昨日收市後中國人壽（02628）發盈喜，預告六月底止淨利潤按年勁升五成，主因受惠於投資收益增加和資產減值損失減少，按去年同期淨利潤96.35億元人仔，即半年賺144.5億元人仔左右，大摩早幾日報告估佢全年賺266億元人仔，內險股或者今日有死貓彈都唔定。

古勝冇點你

萬里長空

上周二個市急升近五百點後，連續五日成交縮到得番「四字頭」，查實昨日升市要多謝中證監主席肖鋼，喺證券監督管理委員會年報上，提到保護投資者，特別是中小投資者利益，被解讀有托市含意。

肖鋼講話之所以反高潮，事關短短一個月前，官媒《人民日報》評論先高調提出，股市唔好再當中央及中證監係「奶媽」，次次股市出事都要出嚟托，估唔到肖鋼咁快就粉墨登場，反串演出向股民餵奶。

目前中港股市淪為全球最平股市，市盈率僅10倍，歸結於中國經濟在海外投資者眼中，展望確實唔樂觀，諾貝爾獎得主克魯曼在紐約時報撰文，就話內地經濟已正臨三十年來最大麻煩，倚重投資，消費佔經濟比重偏低，以及農村提供的剩餘勞動力減少，已到了關鍵的「劉易斯拐點」（Lewis point）。

芬佬觀感大打折扣

古勝無資格評論克魯曼睇法，但認識年資有番咁上下的基金經理，對追逐國策消息或者財金官員「一陣奶媽、一陣嚴父」的言論，唔少直言感到疲憊，機構投資者在長期無法避免的政策風險底下，中資股投資價值，其實必然受到影響。

像最近，曾經是全球最高市值的工商銀行（01398），把巨型銀行一哥寶座拱手相讓給股神巴菲特的旗艦投資富國銀行（Wells Fargo），兩隻巨無霸市值，富國今年升兩成八去到2,293億美元，工行卻原地踏步維持2,236億美元，被富國超越。因估值問題令工行被捨棄？非也，工行一三年PE不到5倍，還不及富國10.8倍的一半，工行增長不夠？也不是，工行五年來核心溢利從822億升至2,387億元人仔，翻近兩番。

講到底，基金經理對行業的超高收入，超低壞帳，充滿「水分」業績，自行扣掉極大風險折讓，加埋國策難測，即管是傳統的PE及PB角度內銀好平，基金也情願揀睇得通睇得透，自己可以較易理解的投資。

股仔宜盡量即日鮮

昨日升市，其中一個特色是細價股交投轉活躍，主板二十大升幅榜僅兩隻「蚊股」，其他都係「毫股」同「仙股」，「仙股」包括黃河實業（00318）、永保林業（00723）同中國管業（00380），相信是炒家見指數持續企在22,000點邊徘徊，博大霧炒轉快。

不過，由於缺乏基本因素支持，呢類股仔炒風多半飄忽兼短癮，炒家見成交轉旺小注跟炒的話，宜盡量即日鮮，輸贏都即日埋單計數，且須嚴守止蝕，免得第朝起身隻股走晒樣逃生無門！

古勝