絲絲講場：世達手機殼指紋認機主
隨住智能電話嘅功能愈來愈多，絲絲對電話仲多過對電腦，裏面儲存嘅訊息分分鐘仲緊要過屋企部desktop，所以為免資料外洩，絲絲都會設定一個好長嘅密碼，但就算密碼有幾複雜都有可能被破解，最安全嘅做法就係用身體識辨！
八月起亞洲多地推出
世達科技（01282）近日就宣布推出全球首個以指紋加密嘅手機殼，只有手機嘅主人先可以透過掃指紋開鎖，同埋將訊息加密，其他人即使睇到有訊息，都只會見到一堆亂碼！呢個手機套仲可以開啟指定嘅Apps，例如社交網站咁，確保你嘅個人資料唔會洩漏咁話！
絲絲聽董事長王國芳講，公司六、七年前就開始研究指紋技術，總共投放咗約3,000萬港元落呢個計劃，認為發展市場龐大，未來將會逐步拓展至網上購物、物流簽發同雲端加密咁，但就唔肯推測股價會否因此推高。目前世達科技已經同新加坡電訊傾掂合作，至於內地同英國嘅電訊公司，就仍然洽談當中。
首批產品會喺八月開始於港、台、星、馬、泰國同印尼推出，預計定價50至70美元，不過暫時只有某幾個Android型號嘅手機適用，蘋果公司未有授權有關技術。