絲絲尋日睇到美國電視台CNBC嘅報道話，單單喺今年一月，中國嘅豪客已經用咗85億美元買外國奢侈品喇！
雖然佢哋強勁嘅消費力可以振興經濟，不過呢班豪客就畀人一種財大氣粗嘅感覺，好多外國人都話佢哋似「暴發戶」咁，無乜文化修養！
不過絲絲收到風，其實內地好多啱啱崛起嘅富豪都好唔滿意呢個稱呼，一班太太仲爭住去上儀態班，為咗變做「貴婦」，就連十萬蚊人仔一個課程都爭住報呀！絲絲唔係講笑o架，北京一間名為瑞儀禮儀嘅學校就開咗個為期十日嘅貴婦「速成班」，務求喺九十個鐘教佢哋點先似一個上流社會嘅人呀！
絲絲聽講，呢個課程會教佢哋成為上流人士，除咗會喺豪華酒店入面教佢哋餐桌禮儀之外，仲會教佢哋點樣好優雅咁食法國蝸牛，又帶佢哋去博物館，教佢哋點樣欣賞名畫，最後仲去埋戶外教佢哋點打golf同騎馬添！不過絲絲就覺得，成個course最實用嘅就係教班闊太點樣正確咁讀名牌，咁下次去歐洲shopping就唔驚因為會讀錯而畀人笑啦！