言談間，衛哲非常睇好中國電子商貿市場，仲話舊年阿里集團旗下淘寶網同天貓網嘅銷售額，已經超過亞馬遜同eBay嘅總和，可見電子商貿喺中國將成為主流，而唔係好似美國咁，只係傳統零售嘅補充品。
不過，佢話其實有啲服務，電子商貿始終都取代唔到，譬如話婚紗攝影。
婚紗攝影生意都靠網
佢話，曾經問過公司一位九十後女同事，話如果第時佢結婚，張結婚相用Photoshop整得唔得？個女同事就話：「你講笑咩？梗係唔得！」所以佢話，最近基金都投資咗喺中國著名婚紗攝影公司金夫人身上。不過佢話，金夫人依家銷售額，已經有40%係來自網上，可見電子商貿幾厲害！