七月一日先至離任嘅英倫銀行前行長金默文，原先話畀半年時間自己歎吓，點知轉個頭就話九月飛去美國紐約大學教書喎，絲絲估佢費事留喺英國，畀人覺得佢會對現任行長卡尼指指點點啩。
據講，金默文過到去會教授央行管理、金融業監管同金融危機，除咗加盟史登商學院嘅經濟系同有「末日博士」之稱既魯比尼做同事外，仲會做埋法學院教授，因為佢啲「央行經」原來都係該校法學院嘅重點研究領域嚟，所以雖然佢只係做得一個學期，十二月就走人，但兩間學院都好歡迎佢。
講真，金默文雖然只係任教短短三個月，但係淨係講番英倫銀行點樣對抗國際金融海嘯嘅經驗，都已經值回票價。事實上，英倫銀行同美國聯儲局就重振海嘯後嘅本土經濟方面，兩者比較，金默文顯然係屬於保守派，同伯老猛咁印銀紙截然不同。兩位央行巨人，邊個救市好啲，紐大學生大可親身體驗一下！
查實財金界猛人辭職之後返大學教書並唔出奇，好似摩根士丹利亞太區前主席羅奇咁，依家就喺耶魯大學管理學院度做高級講師同研究員，而專責金融穩定嘅英倫銀行副行長塔克都打算今年離任後投身美國學術界。
余詩韻