Visa香港及澳門地區總經理陶偉邦（Tom Tobin）名副其實係「本地薑」，佢尋日喺山頂猛講香港有乜好玩，仲玩埋「熊抱」添！邊個咁open任佢抱？原來山頂嚟咗位新住客，一隻身高7呎嘅大白熊畀遊人擁抱。
為咗慶祝山頂纜車一百二十五歲生日，Visa就聯同凌霄閣及山頂纜車合作，舉辦「Visa Loves The Peak」活動，喺凌霄閣觀景台放置一隻身高7呎嘅大白熊，等遊客一邊抱，一邊欣賞風景，阿Tom先抱為快，笑到鬼咁有童真！
Tom係半個香港通，佢話自己周不時都向同事推介吓香港嘅好玩地方，又經常去山頂行吓山同埋做吓運動。佢仲同絲絲講解凌霄閣嘅建築理念：「凌霄閣外形好似湯碗，係寓意富貴咁解」，真係不得不佩服呢位「本地薑」啦！
今次嘅慶祝活動多姿多采，除咗同熊寶寶合照，Visa嘅持卡人喺山頂消費仲可享多頂折扣。唔講唔知，巨熊嘅衣裝會因應節慶而改變，遲啲會有萬聖節裝、聖誕節裝同功夫裝添。
巨熊將「任人熊抱」至今年底，想親近佢嘅朋友，要把握機會喇！