絲絲真係估唔到，原來消費物價指數（CPI）都分平民版同富豪版！最近胡潤研究院就公布咗「2013年富豪消費價格指數」，發現內地富豪嘅消費水平於過去一年只有輕微升幅，升得甚至比全國居民嘅消費價格指數仲要少。
講明係富豪版物價指數，胡潤研究院就拎咗77頂同高品質生活相關嘅商品價格做基準，例如豪宅、靚車、珠寶鐘錶咁，然後比較佢哋今年六月同去年同期嘅市場價格。胡潤研究院指，今年富豪消費價格指數上升1.52%，係指數公布七年以嚟升幅最低嘅一年，並且係首次低於全國居民消費價格指數添。至於全國居民嘅消費價格指數今年六月份按年上漲2.7%，比富豪消費價格指數高成1.18%。
胡潤研究院就解釋，過去幾年內地富豪都好願意使錢，各種奢侈品嘅價格都受到消費需求刺激而大幅上升。不過今年中國經濟增長放緩，加上新一屆政府積極提倡節儉，打擊公務奢侈消費，加上官場嚴厲打擊貪腐，貪官送禮也被迫收斂咗，所以奢侈品嘅需求都減少。計絲絲話，如果連全國居民消費價格指數嘅升幅都少啲，大家唔使捱貴米就最好喇！
余詩韻