Market Insight：家電股 買貨咪心急

到底有乜事發生，令伯南克計劃明年初退任前，親自啟動退市，瞬間變成咁有彈性？毫無疑問，係五月中暗示退市開始，由1.61厘抽上2.72厘的美國十年期債息累事。債息升得太快，唔單止令企業融資成本上升，美國業主的按揭利率也同步回升，冷卻復甦中的經濟及樓市，睇情況伯老情願縱容炒家借多一陣平錢去興風作浪，都唔想幾年救市心血功虧一簣，短期內都會繼續透過出口術，管理市場對長期利率的睇法。

港股昨日呈悶局，恒指跌26點報21,345點，主板成交見七個交易日最低的457億元，指數亦係第七日困在21,177至21,522點的橫行區內，港股恐慌指數（恒指波幅指數）跌0.7去到19.16，是五月中港股開始由23,512點急跌以來，首次低於50日線收市，看來預視未來幾日，即使有突破，幅度都係叻極有個譜。

古勝冇點你

萬里長空

內房股銷情續看好

話口未完，國統局上月全國70大城市，一手樓價強勢持續，按月錄得升幅有63個，按年更係69個，內房股個別發展，富力（02777）最標青升4%，融創中國（01918）升2.5%，寶龍（01238）升2%，龍湖（00960）升1.9%，合景泰富（01813）升1.8%。花旗報告預期強勁銷售增長會延續到下半年，推介首選包括華潤置地（01109）、世茂房地產（00813）、融創及龍湖幾隻。

華潤電力（00836）真係屋漏偏逢連夜雨，併入華潤燃氣（01193）芬佬舉腳反對都未搞掂，日前畀新華社首席記者舉報，三年前過百億收購山西爛礦，出價比估值高出50億元。昨日基金洗倉持續，51球成交，真係幾年未見過咁大場面，短短兩日市值唔見111億元，超過涉及金額兩倍以上，顯見今次已經令這間華潤系的明星，商譽受損非輕。以0.97股換潤燃，等於出價折讓10.9%，無奇迹的話，下周一股東特別大會，併購建議恐怕瓜多過菜。

潤電再跌小注撈貨

經過瘋狂清倉，潤電預期市盈率去到8.6倍，同大唐發電（00991）睇齊，平過華能（00902），如果未來兩日成交縮股價再落多些少，古勝會按計劃買番多少。事件耐人尋味是，這位內地記者遲唔做早唔遲，舉報時機也太巧合吧！

去年業績經已見紅的匯銀家電（01280）發盈警，預告半年盈轉虧，匯銀股價今年跌咗兩成四，衰就預咗，估唔到創維數碼（00751）及TCL多媒體（01070）兩隻家電股隊得仲勁，股價分別跌3.8%及3.9%。中央的節能家電補貼完結之外，近期兩隻電視股畀基金狂沽，事緣係樂視網推出的首批60吋多媒體電視，首批1萬台在個半鐘頭內賣完，對其他電視股造成壓力。

樂視的「超級電視」售價係7,499元人仔，有500元人仔首年內容應供應費用，古勝搵內地「開盒」文，電視啟動要先捆綁睇樂視提供廣告，其他電視、電影透過接駁的互聯網絡下載，買家同傳統電視有好大分別。再搵國美電器（00493）電子商貿網站，未見有創維及TCL的60吋產品，但三星及聲寶60吋平面電視賣緊7,599元及8,099元人仔，樂視嘅定價，睇嚟的確夠晒殺傷力。

在下估計買60吋3D的雲電視，暫時只佔整個消費市場一個較少的比例，創維銷售數據未有特別列明60吋3D雲電視銷售比例，呢個卻是基金最睇好，毛利較高的一類產品，難怪被蹧質。

電視大戰未見真章

創維由五月高位累跌45.8%，TCL累跌47.3%，預期市盈率5.4倍及5.5倍，比平均值折讓38%及49%，差不多逼近歷史低位5倍及4.9倍，似乎市場預視樂視同內容一起捆綁的銷售方式，會顛覆整個市場。對於老翻及BT輕而易舉的內地，古勝則未至於咁樂觀，看來一年後，第一次要用戶交500元人仔年費，先至會到真章。

古勝