絲絲講場：淘寶追債 開名封舖
內地購物網站淘寶網為咗方便賣家資金周轉，於是向佢哋提供貸款，令佢哋融資方便好多。貸款金額由1蚊到100萬人仔不等，息率以日息計，每日0.05厘，真係大小通借，認真周到。之不過，有啲賣家似乎好耐都無還錢，所以淘寶網最近就公布黑名單，公開呢班「債仔」嘅資料。
黑名單睇晒債仔身份
淘寶貸款會向賣家提供兩種貸款，還款期分別係30日同十二個月，而黑名單上嘅賣家全部都已經過晒還款期，但都仲未還錢。淘寶網為咗懲罰呢班賣家，除咗將佢哋嘅淘寶店舖永久關閉兼永遠不准進入之外，更加喺黑名單上公開佢哋嘅資料。除咗佢哋嘅用戶名稱、欠款金額同還款期，就連身份證號碼同所在城市都公開埋。
最高欠22萬 廣深重災
絲絲睇過份名單，發現欠最少錢嘅賣家，只係欠約240元人民幣；但欠最多嗰個，竟然欠咗淘寶約22萬元人民幣！如果從分布地點睇，廣州最多賣家拖數，總共有21家店舖被「封」，其次就係深圳，都有16家店未還錢。
淘寶網就表示，公開黑名單就係要殺一儆百，警醒其他賣家記得要準時還錢咁話。其實呢班賣家已經平均半年無還錢，所以絲絲覺得淘寶網咁做都算合情合理。
余詩韻