自從日本首相安倍晉三去年底推行所謂「安倍經濟學」嘅連串措施，日圓不斷咁跌，變相令日本嘢嘅價格下跌，絲絲相信一眾「哈日族」就最開心啦！
不過，有人歡喜有人愁。絲絲收到風，日本嘅Izumi Seika公司就宣布，因為生產成本係咁升，公司將會停止生產有成廿五年歷史嘅薯片，搞到一班粉絲好鬼傷心！
Izumi Seika由八八年就開始生產薯片，簡直就係日本人嘅集體回憶呀！絲絲聽講，好多粉絲聽到呢個消息之後，即刻喺網上哀悼。有好鍾意食Izumi Seika薯片嘅粉絲仲話，薯片停產就好似自己嘅人生走入死胡同一樣！而且，絲絲仲聽聞，有沖繩嘅粉絲竟然幫Izumi Seika薯片舉行喪禮，仲放埋祭品添呀！
其實一班粉絲搞咁多嘢嚟悼念，都係希望公司可以「收回成命」！不過公司就話，日本政府嘅量化寬鬆政策搞到日圓貶晒值，就連入口嘅麵粉同油嘅價格都大升，生產成本貴過零售價，根本賺唔到錢，所以唔會改變停產計劃呀！
余詩韻