絲絲講場：老闆兼做CEO有竅妙
絲絲覺得每間公司一定有一個靈魂人物，就好似Facebook（fb）嘅創辦人兼CEO朱克伯格同阿里巴巴嘅馬雲咁。不過，有時候一個好嘅創辦人，未必係好嘅CEO，好似Groupon嘅梅森同雅虎嘅楊致遠咁。
事關楊致遠喺當年微軟提出收購一事上，因為決策錯誤令雅虎賣唔成，仲搞到一班股東好不滿，最後畀董事局趕出雅虎，唔畀佢做CEO。舊年七月雅虎終於請到邁耶呢位靚女CEO救亡，一年後嘅今日，雅虎先叫做恢復生氣！
最忌唔肯聽人意見
前幾日絲絲見到，賓夕凡尼亞大學華頓商學院嘅教授Michael Useem，發表咗篇文章嚟分析老闆未必做得掂CEO嘅情況。Michael話，作為CEO，除咗要下放權力同埋將公司利益放喺第一位之外，仲要清楚公司未來嘅發展方向同風險等；不過有啲創辦人唔肯放棄對公司嘅控制權，往往堅持己見，唔願意聽他人意見，亦唔識圓滑咁處理公司嘅人事關係，最後搞到公司上下都好不滿，自己個位都危危乎！
朱仔馬雲最識用人
絲絲覺得好啱，因為創辦人同CEO嘅性質好唔同，創辦人做咗CEO後，最緊要係知人善任，好似fb嘅朱仔同阿里嘅馬雲咁，唔介意放手畀下屬處理公司發展，結果fb成為舊年集資金額最高嘅美國上市公司，而阿里巴巴籌備緊上市，高盛估值就高達1,200億美元添！
余詩韻