Market Insight：石油股扭轉弱勢

然而，期指客明顯做定兩手準備，尤其今晨美國聯儲局布上月議息紀錄，同埋伯南克會發表講話，七月期指收報20,857點，由前日高水變成低水47點收市。內地拆息進一步回落，錢荒暫告一段落，內銀股昨全線反彈，當中又以中小型內銀升得比較標青，中信銀行（00998）及交通銀行（03328）分別上升2.7%及2.3%，重農行（03618）升2.3%。

地產股仍具值博率

近幾星期本地樓市量跌價升，大行估計市場適應辣招影響後，今年樓價跌5至10%，睇番今年恒生地產分類指數，一月見頂至今累積跌18%，應已反映樓價中短期見頂的因素，連中大型地產股重估後資產折讓都有接近兩成，故近日見基金密吸。

古勝冇點你 2013/07/11

萬里長空

始終祖國經濟未見谷底，芬佬無辦法唔搵番股市本土概念股去博一博，恒地（00012）昨日升0.8%，新地（00016）升1.3%，長實（00001）升2.6%。地產分類指數可以彈多5%左右先去返250日線，主觀睇，古勝感覺地產股短期反彈亦至少應該有番咁上下幅度。

十年期美債息已經由低位抽升超過1厘，美國退市在即是路人皆見，到底華爾街最後點去揣摩伯南克講話，不如留番明日先討論，索性寫吓油市。

國際油價有機突破

美國先後推QE1、2、3，傳統話印錢會刺激商品價格，今次反智係紐約期油自○八年海嘯前高位147美元，撻到落32.4美元之後，打從一○年開始，經歷多次量寬，亦僅在75至115美元之間上落，短線波幅仲愈收愈窄。今次美國超低息環境下，能源價格唔升，一來中國為首的餓油國家，需求隨着經濟疲弱回落；再者，美國近年頁岩氣發展有長足之進，對能源價格有降溫作用，目前天然氣價格只及○八年高位的四分之一，國際煤炭價格，亦比一一年高峰期跌掉接近一半。

近三年，以三角形走勢運行的油價，近期有作勢破位的徵兆，執筆時紐約期油見過104.87美元的一年新高，埃及局勢緊張？應該無咁簡單，看來商品投資者認定美國經濟復甦，亦相信歐日及中國經濟已過渡或者快將接近經濟最黑暗一刻，那麼升勢便可解釋。

近日，中石油（00857）A股連升九日，昨日先停一停，至於中石油H股亦係威係勢，由半個月前低位反彈一成八。綜合大行預測，其一三年市盈率10.2倍，同歷史市盈率11倍仲有大約7.3%折讓，國際油價如果進入新升浪（可以升穿110美元作為確認），暫時頗被低估的業績有重估條件，古勝估計，或者短期股價仲有一至一成半潛在上升空間。

早前金價出現多年來鮮有的急跌場面，吸引不少「中國大媽」入市掃金，香港金舖擠滿人，補貨都補唔切。

金飾股需衡量風險

理論上受上述「掃金潮」帶動，金飾股在該段期間經營數據靚仔在意料之內，但問題係大家都知呢個旺盛場面只係短暫現象，近期金價持續弱勢，加上展望下半年內地經濟增長持續放緩，以及中央鐵腕打貪之下，奢侈品消費勢受影響，故因此而跟進金飾股的風險甚高。

昨日周大福（01929）、六福集團（00590）及周生生（00116）升幅介乎3至12%，但收市不久又傳來周大福股東批舊股套現的消息，睇怕今日又要掉頭，揸住金飾股的股民宜及早檢討持倉風險，免得錯失減磅機會。

古勝