證監會副行政總裁張灼華，近排非常忙碌，事關佢喺證監會嘅負責範疇加多一瓣，睇埋國際事務。最近佢仲出任埋來頭甚勁，全名叫巴塞爾銀行監督委員會同國際證監會組織（IOSCO）共同成立嘅保證金要求工作小組嘅聯席主席。加上佢搞緊中港基金互認呢壇重頭戲，可以想像未來佢有幾唔得閒。
金融危機爆發後，全球監管機構都制訂重大嘅監管改革，加上香港同內地喺市場、產品同政策方面嘅交流愈來愈緊密，證監會就新近成立咗國際及中國事務組，隸屬於行政總裁辦公室同中央服務部。張灼華就係呢個國際及中國事務組嘅執行董事。至於證監會原來嘅政策、中國事務及投資產品部就易名為投資產品部。
心水清嘅朋友應該發現，張灼華嘅新職銜有些少微調，由以往嘅政策、中國事務及投資產品部執行董事，改為投資產品部、國際及中國事務組的執行董事，而副行政總裁職位就不變。
換言之，張灼華喺證監會又睇多一瓣，睇埋國際事務。大家都知，依家國際監管愈嚟愈重要，香港係國際金融中心，梗係想更積極參與國際監管工作，協助釐定監管證券市場嘅新遊戲規則。
張灼華手執國際事務、中港基金互認、RQFII（人民幣合格境外機構投資者）、基金審批等多項重要工作，但最難得嘅係，佢竟然係愈忙愈精神！
余詩韻