絲絲講場：馬世民掌GKP首重公平
曾經係前任和黃（00013）大班及前任嘉能可（00805）主席嘅馬世民（Simon Murray），聽講將會成為英國石油公司Gulf Keystone Petroleum（GKP）嘅新主席，呢個消息仲引起唔少討論添。其實人事變動都係好正常嘅事，不過絲絲就收到消息，因為馬世民之前曾經發表過質疑女性工作能力嘅言論，令到外界擔心佢會將呢股「風氣」帶埋入新公司。
曾為貶低女性言論道歉
話說當時馬世民仲做緊嘉能可主席個位時，有一次佢接受訪問時就投訴，話女性嘅事業心無男性咁重，喺事業方面嘅野心比較細，而且佢哋仲有其他更適合嘅工作可以做，例如做吓家頭細務同湊仔咁。呢番言論喺當時惹嚟唔少批評，有人話馬世民嘅諗法古板到係應該屬於中世紀時代。後來馬世民都有為呢番話道歉，不過呢件事已經喺大眾心中留低深刻印象。
事關GKP將會委任多兩位管理層人員，所以大家都好關心，馬世民去到新公司之後仲會唔會對女性有偏見，唔肯請女性做管理層呢？不過GKP嘅現任主席Todd Kozel就幫佢解畫，保證男女都有平等機會，叫大家唔使擔心咁話！
余詩韻