絲絲講場：洪崎坐CEO頭位平靚正
中國企業走出去係大趨勢，其中一個重要條件，就係要有同國際接軌嘅企業管治水平，《福布斯》發表今年中國企業最佳CEO，由民行（01988）行長洪崎奪標，最貴CEO就分別係萬科嘅郁亮同聯想（00992）嘅楊元慶，比較下民行請洪崎做CEO都幾抵。
民行盈利勝在升得快
全國性嘅內銀，間間都係巨無霸，size大隻過民行好多，點解由洪崎奪榜首？原來係因為《福布斯》講明好嘅CEO唔可以只講短期盈利，要睇三年表現，民行最近三年股價就增長189%，相比起其他表現平穩嘅內銀，民行近年盈利的確係升得好快。
至於內地女性董事比例仲係好低，但《福布斯》個榜，有一項令絲絲都感自豪，今年最佳CEO第一次有女士入三甲，佢就係排第三嘅格力電器CEO董明珠。
郁亮楊元慶身價冠AH
要呢啲高層為公司賣命，回報都好緊要，《福布斯》就排列咗一啲高薪CEO。萬科總裁郁亮去年以1,368萬元（人民幣‧下同）稅前薪酬，創市場新高，成為最貴嘅A股CEO。
聯想CEO楊元慶就以8,959萬元成為最貴中資港股CEO，其中一半來自股權報酬，雖然話海外企業CEO要貴啲，不過民行上市咁多年，最佳CEO洪崎舊年都「只係」袋咗534萬元。
余詩韻