NBA球隊熱火當家球星，外號「閃電俠」嘅韋迪（Dwyane Wade）宣布，加盟國產體育品牌李寧（02331）做代言人，並將為李寧設計籃球鞋及波衫；投資界可能對NBA都有番咁上下認識，對韋迪相當受落，李寧尋日全日升咗3.7%。
韋迪○三年起効力熱火至今，○六年球季，韋迪憑其超強的爆發力及帶波速度，帶領熱火勇奪首次NBA總冠軍，個人亦榮獲總決賽MVP榮譽，其後熱火經歷小低潮後，韋迪與勒邦占士及保殊合組「三巨頭」，連奪上屆及今屆NBA總冠軍，韋迪亦同時奪得第三隻冠軍指環。
球場外，韋迪一直被認為係時尚達人，曾經做過多家雜誌封面人物，舊年《GQ》評選年度最佳型男時，韋迪高踞第12位，獲稱讚為極具個人風格。不過，韋迪嘅品味都唔係個個buy，好似佢季後賽期間嘅前衞裝束就飽受爭議，佢不甘反擊：「我倒想看看那些點評我衣着品味嘅傢伙，有時佢哋甚至唔知點樣着好自己件衫」，佢隊友勒邦占士就話：「韋迪有些衣服我是肯定不會穿的……我們品味不同，真的不一樣，非常不一樣。」
不過點都好，風格咁強烈嘅韋迪幫李寧做設計，一定引起唔少回響，北京等地以佢命名嘅系列球鞋「Way of Wade」熱銷一空，李寧執行副主席金珍君話正努力提高生產量。作為今次中國宣傳之旅，韋迪嚟緊仲會出席廣州同上海活動，且看佢能否令李寧重新火起來。