「是拉差」日產七萬支
呢支喺美國出晒名嘅辣椒醬全名叫「是拉差香甜辣椒醬」，樽上印有越文、中文、英文、法文同西班牙文嘅字樣，中間仲有一隻公雞做標記。
呢隻辣椒醬係由美籍華人陳德（David Tran）喺七十年代於越南首創，後來佢逃難至美國，喺異地重操故業，最初喺LA只係匿喺貨車後面擺檔，但依家已經發展成為頗有規模嘅食品公司，幾十年嚟仲紅遍美洲，現時每日生產近七萬支添！
佢有幾受歡迎？近排就有一個美國獨立電影人構思以「是拉差辣椒醬」為題，拍攝一部長達30分鐘嘅紀錄片！
唔講唔知，呢支辣椒醬係○三年仲跟美籍華裔太空人盧傑遨遊太空，做辣椒醬做到衝出地球，絲絲都不禁舉高拇指比個「讚」佢！