雅虎又買嘢喇！今次係聯絡管理軟件公司Xobni，盛傳收購價係7,000萬美元（約5.46億港元），呢家公司曾經畀微軟創辦人蓋茨力讚為「下一代社交網絡」。
雅虎如今同Xobni締結良緣，但諷刺嘅係，兩家都係微軟○八年收購唔成嘅公司！點解當年蓋茨都買唔到，今日落喺雅虎女舵手邁耶手中就咁簡單？
絲絲個人就覺得同邁耶嘅個人魅力絕對有關，好似上個月底，有位希臘嘅小股東喺雅虎股東會上批抨邁耶寧願花錢收購，都唔還富於小股東，但都不忘大讚邁耶係好有魅力！而邁耶早前之所以成功收購社交網站Tumblr，聽講係因為Tumblr嘅後生仔老闆卡普（David Karp）被邁耶美其名嘅誠懇，但實情係魅力所吸引，先促成呢單達11億美元嘅交易。
講番「Xobni」，其實係收件箱（Inbox）嘅倒寫，喺○六年成立，○八年推出嵌入微軟Outlook應用程式嘅產品，可以畀用戶建立聯絡人檔案。此後，Xobni嘅服務延伸到Apple嘅iCloud、Gmail同埋雅虎電郵。值得一提嘅係，Xobni嘅CEO邦福爾蒂○八年初由雅虎過檔，之前喺雅虎嘅社交搜尋部門做過副總裁。
邁耶上任短短一年，已經買落至少16家公司，希望從中招攬軟件工程師嚟強化內部人才同埋技術。而除咗Xobni，雅虎呢個禮拜亦收購咗Qwiki同Bignoggins，分別係iPhone短片製作嘅工具，同埋畀遊戲玩家虛擬體驗管理心儀球隊嘅流動應用程式。
余詩韻