Market Insight：市況乾升 暫宜觀望

所認識的外藉基金經理，的確發現當中不少低估在中國股市賺錢的難度。古勝個人感受，投資中資股，傾向理性企業分析的歐美傳統想法，近年真係不太適用。唔少近年尚有表現者，不少是揣摩國策方針、熟知貨幣政策取向的機會主義者，基本上，同外藉芬佬的思維好唔同。另一客觀因素，係○九年中央在美國次按風暴之後，推4萬億人仔救市，整個A股之後無好過，目前滬綜指比當年高位3,478點，仲累積跌掉四成三。

本周二、三港股喺未見重大利淡消息下狂瀉，技術派認為係短期反彈結束的先兆，賓架界則傳有基金結業，拆倉所以出現見人就殺的場面。咁啱有報道話全球最大對沖基金之一的Citadel，將會關閉本港業務，近三十個員工統統起錨，大跌市同Citadel有無關係？在下同看官們一樣都係估估吓。

古勝冇點你

萬里長空

港股借勢打修正球

Citadel在基金界提供一個茶餘飯後話題，話說○八年海嘯時，Citadel第一次撤離香港，一二年捲土重來，以近200萬元月租遮打大廈再插旗，計埋裝修請人，玩唔夠一年又再拜拜，真係夠晒兒戲。據聞第二次派大信封，有部分仲係第一次關門炒走食回頭草的賓架，五年炒兩鑊，份CV畀佢整花都係其次，張櫈啱啱坐暖準備大展拳腳，又加餸食多次無情雞，確係雙重打擊。

講番個市，恒指兩日大隊655點，昨日彈返321點報20,468點，主板成交縮到個半月新低，得483億元。市後解畫，話埃及軍方表態罷免總統穆爾西，股市出現報復式反彈，加埋葡萄牙債息在短期可能組聯合政府的消息下回落，利好外圍氣氛。個市乾升，一來內地拆息繼續回落，加埋滬綜指平穩兼上番兩千點樓上，之前兩日隊得離譜，來個修正合理。

內房股低位見承接

昨晚美股無市，市場博反彈誘因減低，近期環球股市擔心美國就業市場復甦會提早退市，今晚美國出六月非農就業數據，順理成章係焦點所在，估計失業率保持7.6%或者輕微回落到7.5%，對後市影響比較溫和。過去兩個月，內房股跌得好過分，六月錢荒仲要再踩多一腳，唔少估值開始展現吸引力。趁個市無乜搞作，搵首五個月累積銷售數字，發現唔少其實已經超過全年目標四成二以上。

暫時嚟睇，全年銷售目標完成度最高的，依次係中國海外（00688）的65%、越秀地產（00123）的57%、華潤置地（01109）50%、方興地產（00817）47%、世房（00813）、碧桂園（02007）及旭輝（00884）的46%、保利置業（00119）的44%、綠城（03900）及合景泰富（01813）的43%以及遠洋地產（03377）的42%，當中純揀資產折讓，古勝幾鍾意越地及遠地，分別有66%及42%折讓，負債較輕的潤地亦頗可取，財務槓桿為40%左右，低過同業平均的44%，唔知看官們啱唔啱心水，由近幾日低位開始見支持，看來內房股有醞釀反彈條件。

宏華技術走勢轉弱

今年首五個月，頁岩氣股曾經成為缸邊友熱炒對象，其中安東油田服務（03337）股價由年初嘅4元水平升到上五月高位見6.87元；反觀宏華集團（00196）在去年十二月股價急升過後，今年初由3.4元水平起步，卻連續五個月受制於4元大關，期間不斷有主要股東減持。

到咗六月，消息指頁岩氣第三輪探礦權招標可能未及在年內進行，震動整個板塊，安東油服股價自高位回吐，但現價仍高於年初水平；股價表現令人失望嘅宏華卻跌穿年初水平，近日更收在250日線之下，走勢疲弱。

昨日宏華披露出售了九台陸地鑽機，涉資8.37億元人仔，消息能否提振股價，要拭目以待，但論技術走勢，若然股價未能在短時間內收復250日線，則其後繼續探底的機會大，下一較大支持要落到2元水平，反彈首站阻力在2.8元。

古勝